རྟ་མཆོག

ཧོར་གཙང་འཇིགས་མེད།

བདག་སྙིང་མཐའ་དབུས་བྲལ་བའི་སྤང་ཐང་གི་ལྗོངས་ན།། རིག་པའི་འཇག་རྩྭ་ཟོས་པ་འདོ་རིགས་ཀྱི་རྟ་མཆོག། སྲབ་ཐུར་རྒྱ་ལས་ཐར་བའི་འཚེར་སྐད་ཅིག་སྒྲོག་སྟེ།། སྟོད་ཀྱི་གངས་དཀར་འཁྲིགས་པའི་རི་སུལ་དུ་ཆས་འགྲོ།།

གདོད་མའི་མུན་ཁང་ཕུག་གི་སྲན་ཕུང་ལ་མི་ཆགས།། རྟ་རྫི་རྒན་པོ་ཁྲོས་པའི་ལྕག་ཚན་ལ་མི་སྐྲག། རྨིགས་བཞིས་འབུ་སྲིན་བསད་པའི་སྡིག་པ་ལ་མི་འཛེམས།། སྔ་ཕྱི་གང་ཡང་མི་སེམས་ད་ལྟ་ཡི་འཆར་སྒོ།།

བདག་གི་འཕོང་ན་མཆིས་པ་རྟ་ལྕག་གི་རྨ་ཁ།། བདག་གི་སེམས་ན་མཆིས་པ་ལོ་རྒྱུས་ཀྱི་རྨ་ཁ།། བདག་གི་ངག་ཏུ་གྱེས་པ་ན་ཟུག་གི་འཚེར་སྐད།། བདག་གི་མིག་ཏུ་འབབ་པ་ཕངས་སེམས་ཀྱི་མཆི་མ།། དཔའ་རྩལ་འགྲན་ཟླ་བྲལ་བ་ཕ་རྒན་གྱི་མཆན་ལ།། གསེར་དང་དངུལ་གྱི་འུར་རྡོ་ལྕི་མོ་ཡིས་ཕོག་པས།། མི་རིབས་བརྒྱ་ལ་སོས་མེད་འཆི་བདག་གི་ནད་སྙིང་།། བུ་རྒྱུད་ཕྱི་མར་བཞག་པས་དེ་རིང་ལ་ཐུག་སོང་།།

རིན་ཆེན་གསེར་སྐྱོགས་འཛིན་པ་ན་ཆུང་གི་ཚོགས་ཀྱིས།། སྒེག་མཛེས་སྟབས་ཀྱིས་བཅུས་པའི་ཁ་འབབ་ཀྱི་ཆུ་ཀླུང་།། དོམ་ནག་སྨྱོན་པ་ཁྲོས་པའི་རྐང་པ་ཡིས་བརྫིས་པས།། དམར་ནག་འདམ་གྱི་ཁུ་བ་རྒྱ་མཚོ་ལ་འདྲེས་སོང་།།

རབ་སོ་བདུན་དུ་གྲགས་པ་འབྲི་ཀླུང་གི་སྐེད་པ།། ང་ཡི་རྨིགས་རྩེ་རྣོན་པོའི་སྤུ་གྲི་ཡིས་གཏུབས་ཏེ།། བགྲངས་ཀྱང་དྭངས་པ་མེད་པ་རྙོག་ཀླུང་གི་འབབ་རྒྱུན།། རྟ་གདོང་མེ་རི་འབར་བའི་ཞལ་ཟས་སུ་བརྫིངས་ངེས།།

ང་ཡི་ཕ་ནི་འཆི་མེད་ལོ་རྒྱུས་ཀྱི་རྒན་པོ།། ང་ཡི་མ་ནི་རྒས་མེད་གངས་དཀར་གྱི་ལྷ་མོ།། ང་ཡི་རྣམ་ཤེས་སྐྱེ་མེད་འགག་མེད་ཀྱི་རི་རབ།། ང་ཡི་ཟུངས་ཁྲག་རྙོག་མེད་འཛད་མེད་ཀྱི་རྨ་ཀླུང་།།

ཁྱོད་ནི་ཤ་ཁྲག་སྩོལ་བའི་དྲིན་ཆེན་གྱི་ཨ་མ།། ང་ནི་ཁྱོད་ཉིད་སྐྱོང་བའི་བསླུ་མེད་ཀྱི་བདག་པོ།། ཚེ་སྲོག་གསར་བ་རྙེད་ས་ཁྱོད་ཀྱི་ཕང་བ།། རུས་པའི་ཕྱི་རྗེས་འཇོག་སའང་ཁྱོད་ཉིད་ཀྱི་ཕང་བ།།

ཀྱག་ཀྱོག་འགག་འཕྲང་དོག་པ་མདུན་ཕྱོགས་ཀྱི་ལམ་ཕྲེང་།། མདའ་མཚོན་ཆར་པ་འབེབས་པ་རྒྱབ་ཕྱོགས་ཀྱི་ར་མདའ།། རྡོ་དང་ཚེར་མ་གཟེངས་པ་གདོན་འདྲེ་ཡི་ཆོ་འཕྲུལ།། སུ་དང་གང་གི་གནོད་པས་ང་རང་ལ་མི་ཚུགས།།

ལུས་ལ་འཇིགས་པ་མི་མངའ་རྡོ་རྗེ་ཡི་བྲག་རི།། ངག་གིས་ལྷང་ལྷང་སྒྲོག་པ་སྙན་ངག་གི་འཚེར་སྒྲ།། སེམས་སུ་འགྱུར་ལྡོག་མེད་པ་གངས་དཀར་གྱི་མ་ཡུམ།། སུག་བཞིས་ཤུགས་ཀྱིས་བགྲོད་པ་སྤང་ལྗོངས་ཀྱི་དོན་དུ།།

མཚམས་སྤྲིན་འོད་དམར་འབར་བ་ང་རང་གི་འཇིག་རྟེན།། འཇིག་རྟེན་གསར་བའི་ཁོར་ཡུག་ང་རང་ལ་དབང་ཡོད།། ང་ཡི་འཇིག་རྟེན་སྐྱོང་བ་ང་རང་གི་འོས་བབས།། སྒྲུབ་པས་ངལ་དུབ་མེད་པ་ང་རང་གི་ནུས་མཐུ།།

སྲབ་དང་སྒྲོག་ལ་སྡང་བ་སྙིང་ཁོང་གི་ཞེ་སྡང་།། ལ་ཐུར་ཁྱད་མེད་རྒྱུག་པ་སེམས་གཏིང་གི་ལ་རྒྱ།། ལྡུམ་བུའི་ཁ་ཟས་སྤངས་པ་འགྱུར་མེད་དམ་བཅའ།། སྤང་ལྗོངས་བདག་གིར་འཛིན་པ་བརྩོན་སེམས་ཀྱི་རང་མདངས།། ༼ཡོང་ཁུངས་།མཆོད་མེ་།བོད་ཀྱི་རྩོམ་རིག་དྲ་བ།༽

• ཧོར་གཙང་འཇིགས་མེད།